ការអនុវត្តនូវទំនៀមទំលាប់ពិធីសំពះព្រះខែនេះ យើងសង្កេតឃើញប្រជាជនខ្មែរនៅតាមស្រុកស្រែចម្ការរក្សាបានយ៉ាងខ្ជាប់ខ្លួននៅឡើយ ហើយបើតាមប្រវត្តិ ដែលនាំឱ្យកើតមានឡើង នូវពិធីសំពះព្រះខែនេះដែរ នៅក្នុងគម្ពីរអដ្ឋកថាចរិយាបិដកបានចែងថា៖ ក្នុងដើមភទ្ទកប្បនេះ ព្រះបរមពោធិសត្វនៃយើងទ្រង់បានយោនយកកំណើតជាសសបណ្ឌិត (កំណើតជា ទន្សាយ)។ នៅថ្ងៃពេញបូណ៌មី ព្រះពោធិសត្វ ទ្រង់អធិដ្ឋាននូវឧបោសថសីល ហើយទ្រង់បានឧទ្ទិសព្រះមំសៈ(សាច់ )របស់ទ្រង់ជាទានបរមេត្ថបារមី ដើម្បីបំពេញនូវព្រះពោធិសម្ភារឱ្យបានត្រាស់ជាព្រះពុទ្ធ។ ពេលនោះ ព្រះឥន្ទ្រ ទ្រង់បានជ្រាបនូវសេចក្តីប្រាថ្នារបស់ពោធិសត្វទន្សាយ ហើយព្រះអង្គក៏បានក្រឡាខ្លួនព្រះអង្គជាព្រាហ្មណ៍ចាស់ មកសុំព្រះមំសៈរបស់សសបណ្ឌិតជាអាហារ រួចព្រះពោធិសត្វឱ្យព្រាហ្មណ៍ចាស់នោះបង្កាត់ភ្លើងភ្នក់។ នៅពេលភ្លើងកំពុងឆេះសន្ធោសន្ធៅ សសបណ្ឌិតក៏លោតចូលទៅក្នុងភ្លើងភ្លាម។ ភ្លើងដែលកំពុងតែឆេះនោះក៏រលត់ទៅវិញអស់ គ្រានោះ ព្រះឥន្ត្រព្រាហ្មណ៍ក៏ស្ទុះទៅត្រកងបីយកព្រះពោធិសត្វឡើងទៅដល់ មណ្ឌលព្រះចន្ទ ហើយព្រះឥន្ទ្រក៏បានយកម្មាងសិលាគូរូបទន្សាយដោយអធិដ្ឋានឱ្យនៅជាប់រហួតដល់ទីបំផុតនៃកប្ប។